ఉండ్రాజవరం జిల్లా పరిషత్ ఉన్నత పాఠశాలలో టాయిలెట్స్ ఆధునీకరణకు కరూర్ వైశ్యా బ్యాంక్ మూడు లక్షల రూపాయల విరాళం ప్రకటించినట్లు హెచ్ ఎం కె ఎస్ కె మాణిక్యాలరావు శనివారం తెలిపారు. ఈ సందర్భంగా ఆయన మాట్లాడుతూ అభివృద్ధిలో దాతలు అందిస్తున్న సహాయం, బావి తరాల నిర్మాణానికి ఎంతో దోహదపడి, సమాజానికి ఆదర్శప్రాయంగా నిలుస్తుందన్నారు. పాఠశాలలో బాలురు, బాలికల టాయిలెట్స్ బ్లాక్స్ ఆధునీకరణ నిమిత్తం బ్యాంకు ప్రకటించిన విరాళంతో పాటు స్థానిక సుంకవల్లి ట్రస్ట్ అధినేత, ప్రజావైద్యులు డాక్టర్ సుంకవల్లి సూర్యనారాయణ రూ.50,000 లు, పాఠశాల సాంఘిక శాస్త్ర ఉపాధ్యాయులు, యు.టి.ఎఫ్. జిల్లా సహాధ్యక్షులు యివ్వల రాంబాబు రూ.50,000 లు విరాళంగా గణిత దినోత్సవం సందర్బంగా ఏర్పాటు చేసిన కార్యక్రమంలో అందజేశారు. ఈ ఆర్ధికసహాయం ద్వారా పాఠశాల విద్యార్థులకు ఎంతో ప్రయోజనం చేకూరుతుందని పలువురు దాతలను కొనియాడారు. ఇటువంటి మంచి కార్యక్రమానికి రూపకల్పన ద్వారా సారధ్యం వహించిన ఇంగ్లీష్ స్కూల్ అసిస్టెంట్ చెరుకూరి దుర్గాప్రసాద్ ను ఉండ్రాజవరం బౌద్ధ ధమ్మ పీఠం పీఠాధిపతి భంతే అనాలయో పలువురు ఉపాధ్యాయులు అభినందించారు.
